„Народно движење за Македонија изразува вчудоневиденост од вчерашната изјава на претседателот на Македонската Академија на Науките и Уметностите дека улогата на Академијата ја гледа во тоа таа да создава клима на толеранција и дијалог и дека на нашето општество му бил потребен еден квалитативен скок напред.
За НДМ таквите совети на МАНУ се слаби без да се каже како да се направи квалитетен скок напред, а токму МАНУ треба да го каже тоа со оглед дека барем формално-правно во неа е концентрирана врвната домашна памет во земјата.
НДМ сака да им ја освежи меморијата на академиците кои манифестираат селективна сенилност дека не се членови на невладини организации и граѓански здруженија и дека за праќање апели за толеранција и дијалог веќе го имаме претседателот Ѓорѓе Иванов, и оттука, преголем финансиски товар за земјата е обидот и МАНУ да се сведе на праќање на апели за создавање на клима за толеранција и дијалог.
Затоа, НДМ ги повикува академициите да го оправдат трошењето на народни пари и да не се луксузираат врз грбот на граѓаните како даночни обврзници, со тоа што, најпосле ќе седнат и ќе напишат стратегија за заштита на националните и државните интереси.
Да потсетиме, за разлика од соседните земји единствено МАНУ сеуште нема изработено излезна стратегија како македонски проект.
НДМ и македонскиот народ очекуваат од МАНУ да видат и оценат стратегија како национален проект, бидејќи борбата за опстанок и самостојноста на Македонија продолжува и по стекнувањето на независноста во 1991, земајќи предвид дека земјата е исправена пред сериозни предизвици до степен да го загрозат опстанокот на земјата“, се вели во писменото соопштение на НДМ.