По повеќе од три години откако е истечен и последниот договор за закуп на охридските плажи, ЕВН ја исклучи струјата во пет објекти. Неофицијално, без електрично напојување од утрово се Охрид Куба, Кадмо, Бела Виста, Канео и Потпеш. Дел од овие плажи, функционираа и како ноќни клубови. Од ЕВН за „А1он“ потврдија дека постапувале на охридското крајбрежје.
„За исклучувањето се известени сите корисници на кои им е истечен договорот за краткотраен закуп“, велат од ЕВН за „А1он“.
За да на објектите се приклучи струја, мора да се поседува доказ за сопственост на објектот или парцелата, а плажите кои останаа без напојување се на државата, а не на фирмите кои без концесии ги управуваат. Дополнително, се бара и извод со вцртан објект од Детален урбанистички план.
Градоначалникот на Охрид, Константин Георгиески, минатата недела обнзани дека без концесии, фирми правеле приход и до 190 милиони денари. Тој најави уривање на се што е узурпирано, а не е во согласност со законите.
„Треба на сите да ни стане јасно дека ваква урбанизација и користење на крајбрежјето во строго заштитените зони, едноставно, повеќе, нема да има“, рече Георгиевски.