Министерството за внатрешни работи изминатите 24 часа издаде 253 потврди на илегални мигранти кои изразиле намера за поднесување барање за азил. Дел од нив, меѓу кои и деца, се откриени во товарен воз кој од Република Грција пристигнал на Железничката станица во Гевгелија.
Илегалните мигранти се откриени откако почнале да удираат од внатрешноста на вагонот, заради неподносливите услови внатре, односно опасноста да се задушат.
Врз основа на измените и дополнувањето на Законот за азил и привремена заштита од 18.06.2015 година, Министерството почна со издавање потврди за искажана намера за поднесување барање за признавање право на азил во Република Македонија на странските државјани кои илегално влегуваат на нашата територија.