Откако во јавноста се појавија информации дека Македонци од Мала Преспа се носат да вадат лични карти на адреси во Ресен за да гласаат за ВМРО-ДПМНЕ на наредните избори, од граѓанската асоцијација „Мост“ велат дека со внимание ги следат информациите во врска со овој случај и бараат неколку одговори од институциите.
„Ние случајот го следевме преку медиумите и веќе имаме издадено став по ова прашање“, рече во интервју за радио Слободна Европа, директорот на „Мост“, Дарко Алексов.
„Тоа што е важно да се утврди во дадениов случај се три работи. Прва работа е да се утврди дали тие луѓе се запишани во избирачкиот список или не. Втората работа е, ако се запишани во избирачкиот список, каде гласале на претходните избори и од кои општини мигрирале во општината што ја споменавте. И третата работа е дали откако ќе им се издадат или им се издале, не знаеме се уште, пасоши и лични карти, дали тие луѓе ќе бидат избришани од избирачкиот список во оние општини кадешто претходно биле заведени како гласачи и го остварувале или не го оствариле своето право на глас. Тоа се трите работи за кои во оваа фаза треба да се добијат информации. Ние и тогаш, еве и сега даваме апел до институциите да постапат по тоа прашање и да одговориме на овие прашања, со што би се добило на транспарентност и на доверба во самиот избирачки список и во самиот избирачки процес што следи“, вели Алексов.