МОН: Се изработува Стратегија за паметна специјализација за модерен пристап и економски напредок на државата

Од:

Се интензивира процесот за креирање на Стратегија за паметна специјализација кој започна во 2019 година. Целта е Северна Македонија час поскоро да добие стратешки документ кој обезбедува модерен пристап за економски развој, преку меѓусебно поврзување на академската заедница, бизис секторот, владините институции и граѓанскиот сектор за заедничко детектирање и делување во областите во кои државата има најголем потенцијал и доволно ресурси да инвестира. Со тоа ќе се забрза севкупниот државен напредок и конкурентност во глобалната економија. Ова е заеднички став на вицепремиерот за економски прашања Фатмир Битиќи и министрите за образование и наука и за економија Јетон Шаќири и Крешник Бектеши, кои денес на настан во Владата го означија продолжувањето на следната фаза од процесот на креирање на стратефијата која воедно е и еден од предусловите за пристапување кон членство во Европската унија.

„Ова е процес започнат пред 3 години. Вклучени се институциите на системот, а најважни учесници се бизнис заедницата, научно – академската фела и невладиниот сектор. Овие четири страни заеднички работеа и веќе првично детектираа четири области во кои Северна Македонија има потенцијали за голем развој и кон кои треба да се насочи. Се работи за паметно земјоделство и прехрамбена индустрија; информатичко – комуникациска индустрија; индустрија 4.0 каде спаѓаат електро – машинска, металопреработувачка и автомобилска индрустрија, и последната област е паметни објекти и материјали“, рече Шаќири, нагласувајќи дека детектирањето е направено согласно методологија на Заедничкиот истражувачки центар на Европската комисија.

„Нотирано е дека треба да се вложува и во туризмот и во енергетиката како сегменти кои ги поврзуваат четирите области кои ги споменав“, додаде министерот за образование и наука.

Тој информираше дека за секоја од четирите области формирани се посебни работни групи и тие од денес започнуваат интерни дебати кои ќе траат до крајот на мај, со цел јакнење на меѓусебната доверба, промовирање на нови форми на соработка, детално скенирање на потенцијалните области за инвестирање и допрецизирање на најдобриот пристап за тоа како и што да се вложи во тие области.

Според Бектеши усвојувањето на оваа Стратегија, ќе обезбеди повеќекратен ефект.

„Ќе знаеме точно каде, во кои области имаме добар потенцијал што може да се искористи и што треба да направиме, да го одбереме најдобриот пристап за да го оствариме целосно тој потенцијал. Друга важна работа е што со самото усвојување на овој документ, нам како земја ни се отвораат нови финансиски можности. Всушност оваа стратегија е предуслов за искористување на структурните фондови на ЕУ. А тоа се пари кои ќе значат стимулација на нови мерки и активности во областа на образование, економијата, развој на иновации и генерално на науката“, додаде Бектеши.

Вицепремиерот за економски прашања Фатмир Битиќи истакна дека од денес па во следните неколку месеци ќе се организираат повеќе јавни настани поврзани со процесот на изработка на Стратегијата за паметна специјализација, за, како што рече да се сензибилира јавноста за оваа тема, да се појасни што побразбира овој процес кој терминолошки звучи непознато и апстрактно, но и да се вклучат што повеќе луѓе во истиот.

Информираше дека поддршка за креирање на Стратегијата е обезбедена од Светска Банка, GIZ и ИМЕ програмата финaнсирана од Швајцарската агенција за развој и соработка, а подоцна, како што рече вицепремиерот, ќе се вклучи и Развојната банка и други релевантни домашни и меѓународни институции.

Процесот на креирање на Стратегијата за паметна специјализација го координира Министерството за образование и наука со поддршка на Министерството за економија, а под покровителство на вицепремиерот за економски прашања.

Би можело да ве интересира

Започна полагањето на државната матура во учебната 2021-2022 година

Ана Ололовска

Нема договор, преговорите помеѓу СОНК и МОН продолжуваат за уште 10 дена

Ана Ололовска

Шаќири: Покачување на платите ќе има, најдобар интерес е учениците да се вратат на настава

Ана Ололовска

МОН: Настава мора да се организира и за време на штрајк

Ана Ололовска

Шаќири: Нема огромен број на позитивни случаи на наставници и на деца

Ана Ололовска

Ковачевски од Прилеп: Вложуваме над една милијарда денари за капитални проекти во образованието во 2022 година

Ана Ололовска