Потребна е политичка волја за решавање на прашањето за името со „ФИРОМ”, порача идната Висока претставничка за надворешна и безбедносна политика на Европската унија, Федерика Могерини, на сослушувањето пред Комитетот за надворешни работи (АФЕТ) на Европскито парламент, јави дописникот на МИА од Брисел. По 50-тина прашања поставени од европратениците во рамки на АФЕТ-групата, Словенецот Алојз Петерле, претседател на Мешовитиот комитет на Европарламентот и македонското Собрание, како последен го постави прашањето за иднината на земјите од Западен Балкан во однос на евроинтеграциите.
Одговарајќи на прашањето на Петерле, наследничката на Кетрин Ештон истакна дека и е драго што последното прашање и дозволило да спомене и нешто и за тоа прашање. Според екс-министерката за надворешни работи на Италија, не би било фер да се има еден приоритет на Балканот и дека дополнителна вредност за сите земји е регионалната димензија и ЕУ има поврзаност со овие земји, притоа условувајќи ја Република Македонија со навредливиот акроним “ФИРОМ”:
– Ризикуваме да ги удвоиме проблемите, ако не работиме на интеграција на овие земји. Приоритет број еден е Босна и Херцеговина, по изборите да се осигура раст и да се имплементира начин земјата да излезе од криза. Разговори на Србија и Косово се одвиваат добро на техничко ниво, но треба и на политичко. Албанија има уникатна шанса за реформи, а Црна Гора е прва на листата во однос на напредокот кон Унијата. Во однос на ФИРОМ и прашањето за името, верувам дека треба да се најде политичка волја за негово решавање – посочи Могерини, додавајќи дека се надева дека не заборавила некоја од другите земји од Балканот.
Федерика Могерини истакна и дека треба ЕУ треба да се грижи и за соседството, вклучително и на Балканот и Турција, бидејќи според неа “целата политика на проширување е добар механизам”.
Во повеќе од тричасовното сослушување од страна на европратениците, во одговорите на Италијанката доминираше темата за односите на ЕУ со Русија и ситуацијата во Украина. Таа постојано повторуваше дека Унијата мора да остане поврзана со Русија, која според не е партнер, но е сосед, а таа вети дека ќе се фокусира на одбранбената и безбедносна политика, да спречи кризи и да се справувам со пост-кризните ситуации.
Наследничката на Кетрин Ештон порача и дека ЕУ треба да го добие постојаното место во Советот за безбедност на Обединетите нации на Франција и на Велика Британија. Таа, исто така, истакна дека официјален Брисел, во партнерство со НАТО ќе посвети еднакво внимание во обезбедување на мир и безбедност на Истокот, но и на Југот.