Министерот за здравство Арбен Таравари придружуван од новиот директор на Општата болница во Кичево, Билјана Настеска попладнево го посети стариот објект на таа јавна здравствена установа, но и новиот објект кој е во изградба.
Таравари изјави дека посетата на болницата е во рамки на неговата турнеја низ сите болници во земјата со цел одблиску да се запознае со условите во кои тие работат.
– Како Влада конечно обезбедивме средства за финалната фаза за доизградба на новата болница, која иако е почната во почетокот на деведесетите години од претходните влади, за жал не е дозавршена. Можам да ветам дека како нова Влада обезбедивме средства и за месец дена ќе го распишеме тендерот за завршната фаза и дека конечно кичевчани ќе се здобијат со нова болница до март или април 2019 година, рече Таравари.
Тој додаде дека дека се залагаат да се отвораат и амбуланти во руралните средини, но, како што рече, се соочуваат со недостиг на лекари.
