Поранешниот директор на УБК и прв братучед на Никола Груевски, Сашо Мијалков пред почетокот од денешното рочиште за случајот „Титаник 2“ на СЈО, изјави дека не знае каде се наоѓа експремиерот Груевски.
– Не знам, кусо одговори Мијалков на влегување во зградата на Кривичниот суд, запрашан од новинарите за тоа дали знае каде е неговиот братучед.
Поранешниот премиер веќе неколку дена е недостапен за органите на прогонот, кои го бараат за спроведување во затвор за издржување на казната од две години затвор, што ја доби за случајот „Тенк“.
Откако во петокот не се појави во затворот „Шутка“, а истото се случи и вчера, синоќа МВР издаде потерница по него и почна да го бара, прво во неговиот дом, а потоа и кај седиштето на неговата партија.
Виктор Јованов