Миграциската криза, актуелните геополитички случувања во светот, но и состојбите со партиите и медиумите се во фокусот на научните трудови кои денеска и утре ќе бидат презентирани на втората меѓународна научна конференција на Штипскиот универзитет.
Иван Илиќ од Правниот факултет во Ниш, Србија, рече дека на Балканот, Македонија и Србија кои не се членки на ЕУ, на свој грб ги носат најголемите проблеми со мигрантите. Македонија, смета Илиќ, има право што ја контролира својата граница и бара легален влез на мигрантите.
– Македонија и Србија се дел од некоја вештачка бегалска криза. Се поставува прашањето, зошто мигрантите ги враќаат во Србија или Македонија кога не дојдоа од овие земји, туку од Грција која е членка на ЕУ, зошто таму не ги враќаат, истакна Илиќ.
Деканот на штипскиот Правен факултет Јован Ананиев нагласи дека во политичките науки има едно правило, нема решение на криза, туку надминување на проблемот, а науката е овде тоа да го понуди.
Според Блажо Боев, ректор на Универзитетот „Гоце Делчев“, научните конференции на факултетите ќе станат секојдневие за професорите и вработените, а секако и за студентите, кои треба да учат од нив. Тоа во наредниот период ќе биде секојдневие и на штипскиот универзитет.
На конференцијата се пријавени повеќе од 150 трудови со учесници од 18 земји од светот. Трудовите се однесуваат на повеќе општествени дисциплини како правото, политичките науки, социологијата, медиумите и комуникациите.
Конференцијата ја организира Центарот за правно-политички истражувања при Правниот факултет на Универзитетот „Гоце Делчев“- Штип во партнерство со Факултетот за право, политички науки и криминологија при Универзитетот во Лиеж, Белгија, како и Правниот факултет при Државниот универзитет во Воронеж, Русија.