Генералниот секретар на ВМРО-ДПМНЕ, Христијан Мицкоски, објави дека се повлекува од советничкото место во Град Скопје.
„Почитувани браќа и сестри дозволете ми да Ве информирам дека денес се повлекувам од местото советник во градот Скопје. Ми беше чест и задоволство што ја предводев градската листа на ВМРО ДПМНЕ и коалицијата ‘За подобра Македонија’. Сакам да Ви се заблагодарам Вам драги мои сограѓани што го дадовте гласот за листата која ја предводев на последните локални избори“, напиша Мицкоски на Фејсбук.
Тој пишува дека неговата борба против актуелната власт продолжува во партијата како генерален секретар.
Мицкоски во објавата на Фејсбук уште пишува дека локалните избори биле најлошо организирани избори во Македонија.
„Почитувани сограѓани, браќа и сестри, сведоци бевме на најлошо организираните избори во демократска Македонија од осамостојувањето до денес. Притисоци, уцени, закани, поткуп, насилство, злоупотреба на државни ресурси за партиски цели и што ли уште не…, за жал не се свесни дека оваа рана што ќе ја остават позади себе многу тешко ќе зарасне ќе помине…, но борбата против овој ужас ќе, и мора да продолжи, тоа и го должиме на татковината. Со почит…
ПС: Најпрвин ќе те игнорираат, па ќе те исмејуваат, потоа ќе се борат против тебе, но ти на крајот ќе победиш”, пишува Мицкоски.