Лидерот на ВМРО-ДПМНЕ, Христијан Мицкоски преку социјалните мрежи призна дека бил во кафеана во Дебар Маало.
Тој не прецизира дали седел во затворен дел на објектот, но вели дека е подготвен да ја плати паричната казна.
„Да, точно е дека бев со двајца мои познаници во ресторан во Дебар Маало, прв пат по укинувањето на забраната за посета на угостителските објекти, поради што и не бев информиран доволно за новите протоколи. Ако тоа е мојот најголем грев и моја грешка и пропуст, јас тоа го признавам и подготвен сум да платам парична казна поради тоа. Не мислам дека луѓето не знаат да направат грешка, битно е грешката да не е таква да направи лошо некому, да наштети некому, да биде непоправлива. Жал ми е што денес, покрај погубните бројки на ново заболени и починати случаи, катастрофалното менаџирање со кризата од коронавирусот, економскиот дебакл на власта, кражбите на парите на граѓаните со милионски суми, рекетите, распродажбата на националните интереси, денеска тема стана и мојата средба со познаници во една Скопска кафеана. Човечки е да се згреши, и не сум лицемер кој едно говори пред камерите, а друго зад нив. Сакам да демантирам, дека имав било каков контакт со било кој од државната инспекција или органите на државата. Тоа се измислици за да се потхрани дефокусирањето на јавноста“, напиша мицкоски на социјалните мрежи.
Тој активноста на ЕБР, кои се уште чекаат да се обезбеди судски налог со цел да се одземат ДВР и снимките од камерите, ја гледа како обид за дефокусирање на јавноста.
„Во услови кога имаме вистинска катастрофа од ширењето на корона заразата и целосно фијаско на власта која е дезориентирана и не е ефикасна, таа се занимава со тоа дали сум ручал внатре или надвор во ресторан, притоа комплетно покажувајќи го на дело нејзиното нечесно лице и инсталации. Дефокусирајќи ја јавноста со таа “епска битка” на специјалците од ЕБР, со вработените од ресторан, јавувајќи се по медиуми, да прават приказна од нешто каде нема и низа други дезинформации, со цел да се дефокусира вниманието од вистинската катастрофа со животите на граѓаните, предизвикана од неспособната власт. И да бидам искрен, овој мој човечки грев, сметам дека е многу помал од состојбата која денес се случува врзана со губењето на животи и неодлучноста на владата која го загрижува здравјето на сите. Денес вистинската тема е што имаме 101 ново заразен и 4 починати. Власта сака да продаде приказна за да ја скрие вистината за себе, и фактот дека моето одење во ресторан не зарази никого, но нивната неспособност и СДСМ кластерот, да. Ако некој имаше дилема, сега е повеќе од јасно, кристално јасно дека власта и параполициските сили диригирани лично од Зоран Заев ме следат. И треба да знаат, Македонија не заборава, а сите тие ќе бидат поразени“, додава Мицкоски.
Полицијата е се уште присутна пред ресторанот каде Микоски попладнево беше затекнат, со цел да се обезбедат снимките од камерите.
Претходно „А1он“ објави дека пооладнево Мицкоски бил затекнат како излегува од кафеана, откако од страна на пазарните инспектори кои два и пол часа не можеа да влезат во затворениот дел на објектот, со објаснување дека било заклучено, а внатре нема никој.
Инаку според протоколите на Владата забрането е да се седи во внатрешноста на угостителските објекти, а смеат да работат само летните тераси.