На лидерската средба во Кабинетот на претседателот Стево Пендаровски, лидерот на ВМРО – ДПМНЕ Христијан Мицкоски се обидел да избегне дискусија за датумот на зборите, но подоцна во текот на разговорите барал токму датумот за избори да се утврди со консензус, велат за „А1он“ извори присутни на средбата.
Мицкоски рекол дека има доверба во Комисијата за заразни болести и во техничкиот премиер.
Лидерската средба почна во 13 часот и се уште трае. Се разговара за терминот на одржување на предвремените парламентарни избори, кои беа закажани на 12 април, но беа одложени со уредба на Владата поради прогласувањето вонредна состојба и ширењето на ковид-19.
Лидерите исто така се очекува да зборуваат и за евентуално продолжување на вонредната состојба, за состојбата со коронавирусот во земјата и препораките на здравствените власти, и како да се спроведе кампања и гласање, а да се заштитат граѓаните.
На средбата беа поканети претседателите нa политичките партии од власта и од опозицијата кои на последните парламентарни избори освоија пратенички мандати со самостојни листи.
Пред почетокот на средбата министерот за здравство Венко Филипче на прашање за датум за изборите рече дека ни следи мирен период во однос на коронавирусот, а сликата наесен дополнително може да ја искомплицира сезонскиот грип.