Христијан Мицкоски денеска на прес-конференција рече дека ВМРО-ДПМНЕ не стои зад протестите за Законот за јазици.
Одговорајќи на новинарско прашање, не откри кога ќе почнат протестите што ги најавува неговата партија.
Мицкоски во изјавата на Али Ахмети дека Законот за јазици ќе биде донесен со или без потпис на претседателот Ѓорге Иванов, препознава форсирање еднонационална агенда, а не реформи кои би биле во интерес на сите граѓани.
– Тоа е став на Ахмети кој и натаму им пркоси на законите и Уставот. Се гледа дека еднонационалната агенда е негов приоритет. Не се приоритет реформите кои ќе значат квалитет во животот на сите граѓани. Продолжува со насилничкото однесување, продолжува да ја наплаќа концесијата што Зоран Заев ја има кон него, а тоа е резултат на ова десетмесечно катастрофално владеење, истакна лидерот на ВМРО-ДПМНЕ.
Според него, јавноста е згрозена од чинот што се случи во средата на собраниската седница.
– Со девијантно и насилничко однесување, во Собранието не беше испочитувана волјата на најмалку 450.000 гласачи, оцени Мицкоски.