Борјанчо Мицевски, кандидат за градоначалник на Крива Паланка од СДСМ и коалицијата, денеска во изјава за медиумите рече дека затворен зелен пазар е еден од клучните приоритетни проекти на идната локална власт предводена од СДСМ.
– Нашиот план предвидува архитектонско решение кое ќе обезбеди соодветен трговско деловен простор наменет за поставување на тезгите како и соодветен паркинг простор кој може да се користи и во деновите кога не е пазарен ден, намалувајќи го со тоа сообраќајниот хаос во градот. Со цел да го олесниме движењето предвидуваме изградба на кружен систем на движење на возилата, со изградба на дополнителна лента околу самиот зелен пазар, рече Мицевски.
Тој додаде дека со овој проект Крива Паланка ќе го реши долгогодишниот проблем и ќе обезбеди места и за оние трговци кои досега немаа добри услови и својата дејност ја извршуваа на улица или на тротоари.
– Затворениот зелен пазар, независно од временските услови, ќе овозможи земјоделците секојдневно да ги пласираат своите производи а не само во пазарните денови а граѓаните да се снабдуваат со свежа храна, секој ден. Граѓаните на Крива Паланка заслужуваат нов, модерен пазар. Ние стоиме на нашите ветувања дека до крајот на мандатот тој ќе биде изграден и затоа ја бараме вашата поддршка за овој и за многу други проекти во интерес на сите граѓани, рече Мицевски.