По денешната јавна расправа одржана од судскиот совет за оцена на обвинителниот акт во кој петмина осомничени се товарат за шпионажа, пуч и противправно прослушување, адвокатот, Филип Медарски, изјави дека една од аномалиите на обвинението е тоа што не е наведена странската служба за која се вршело прислушувањето, а со тоа шпионажата.
– Во обвинението не е прецизирано за која странска држава се прибирани тие податоци. Ова е една од тие аномалии на обвинението кои ги истакнавме. Вака поднесеното обвионение за шпионажа не може да опстои, судот не може да постапува по вака поднесено обвинение за шпионажа – изјави тој.
Јавната расправа траеше речиси пет часа и свои излагање дадоа адвокатите на одбраната, јавниот обвинител кој го води предметот, како и првосомничениот, Зоран Верушевски. Медарски рече дека очекува судот по разгледувањето на аргументацијата на одбраната да ги отфрли обвиненијата како неосновани.
– Главните пропусти се тоа што описот на кривичните дела дадени во обвинението не одговараат на законсските битија на кривичните дела како што е тоа пропишано со кривичниот законик – рече тој.