Заменик претседателот на Владата задолжен за европски прашања, Бојан Маричиќ, денеска во Брисел оствари работен состанок со комесарот на ЕУ за соседство и проширување Оливер Вархеји, на кој разговараа за процесот на скрининг, за следните активности во процесот на преговори и за актуелната политичка ситуација во Северна Македонија.
-Во вистински и клучен момент ја потврдивме европската перспектива на Северна Македонија. Сега е најважно да сме фокусирани на реформите и да останеме на европскиот пат. Тоа е наша обврска и задача која им ја должиме на граѓаните, да обезбедиме просперитет и напредок на земјата, рече на состанокот Маричиќ.
Вицепремиерот Маричиќ на еврокомесарот за проширување Вархеји му брифираше за скрининг состаноците и за подготовките за билатералниот скрининг, како и за посветеноста и мотивацијата која ја имаат институциите за процесот.
Еврокомесарот Вархеји на главниот преговарач со Унијата, Маричиќ, му посака успешен скрининг и испрати порака да останеме силно посветени на европската реформска агенда, како и на градењето на добрососедски односи со Бугарија и напредокот во исполнувањето на обврските од страна на двете држави.
Комесарот потенцираше дека сега е најважно сите во Северна Македонија да застанат зад европската иднина на земјата и да помогнат во процесот на преговори со Европската Унија, додавајќи дека тоа е процес кој е важен за иднината на Северна Македонија и процес кој носи подобар живот за граѓаните.
На состанокот беше разговарано за последните подготовки за потпишување на Договорот од Фронтекс, кој средината на октомври ќе биде потпишан, но и за економски теми, во пресрет на зимата која доаѓа и предизвиците со кои ќе се соочиме, предизвикани од енергетската и економската криза. Во таа насока зборуваат и за Инвестицискиот план за Западен Балкан и за забрзување во реализацијата на регионалните проекти, особено оние од инфраструктурата и енергетиката.
Денеска во Брисел продолжува скрининг состанокот за поглавје 24 – Правда, слобода и безбедност, кој ќе трае два дена, а веќе наредната недела продолжуваат состаноците за поглавје 23 – Правосудство и темелни права.