Министерот за информатичко општество и администрација Дамјан Манчевски и директорот на фондот за иновации и технолошки развој Јово Деспотовски, денеска остварија работна средба со еврокомесарката за дигитална економија и општество Мариа Габриел.
Средбата се оствари во рамки на Startup Summit 2018, што денеска се одржува во Софија, Р. Бугарија, а се разговараше за повеќе теми од областа на дигитализацијата на Македонија и за соработката помеѓу државите од Западен Балкан.
Министерот Манчевски ја претстави идејата и подготвеноста на Македонија да се приклучи кон иницијативата 5Г прекуграничен коридор за автопатишта, што претходно беше потпишан од страна на Србија, Бугарија и Грција. Еврокомесарката Габриел ја поддржа спремноста на Македонија и понуди целосна помош од Европската Комисија за реализација на оваа идеја.
Манчевски и Деспотовски го претставија концептот на научно-технолошкиот парк што е во финална фаза на подготовка, а еврокомесарката Габриел изрази заинтересираност на почетокот на следната година да го посети и на тој начин да го поддржи концептот на технолошкиот парк.
Еврокомесарката Мариа Габриел, ја повтори важноста од приклучување на Р. Албанија и Р. Косово, кон договорот потпишан помеѓу Македонија, Србија, Црна Гора и Босна и Херцеговина, за намалување на цените во роаминг, што понатаму би прераснало во целосно укинување на цените во роаминг за земјите од Западен Балкан до 2021-ва година.