Кандидатот на СДСМ за скопски градоначалник, Јани Макрадули ја повика владата да каже како е надминат проблемот околу Топлификација, откако Макпетрол вчера објави дека ќе прекине со испораките на гас и мазут кон оваа компанија поради ненаплатени долгови.
„За да ја извлече од нелогичната позиција во која се наоѓа Топлификација, Владата вчера вети дека ќе посредува и најави дека проблемот со снабдување со топлинска енергија е решен. Но дали Владата само усно гарантирала, дали го исплатила долгот од 1,7 милиони евра што Топлификација го има кон Макпетрол или подмирила само дел, остана непознато“, изјави Макрадули.
Според него, недозволиво било владата да троши и гарантира со народни пари, а Топлификација да наплаќа од граѓаните.
„Нејасно е како е можно Топлификација да се гуши во долгови кога граѓаните навреме ги плаќаат сметките и тоа високи, во текот на целата година, а од пред некое време плаќаат и граѓаните кои не се корисници на услугите за греење“, рече Макрадули, додавајќи дека граѓаните на Скопје на почетокот на грејната сезона веќе се исплашени дали ќе биде обезбедено навремено греење до нивните домови.
Тој оцени дека владата дополнително ги направи Скопјани зависни од монополот на Топлификација бидејќи не инвестирала во други извори поевтини извори на енергија.