Можноста за воведување систем за сателитска навигација што ќе овозможи полетување и слетување на скопскиот и охридскиот аеродром во услови на магла, беше тема на денешниот семинар за развој на глобална сателитска технологија што го организира Агенцијата за цивилно воздухопловство.
За системот за сателитска навигација и можноста како нашите аеродроми да бидат вклучени во системот за глобална сателитска навигација на состанокот дебатираа преставници од Еуроконтрол, Европската комисија и Агенцијата за сателитска навигација при Европската унија, како и претставници на М-НАВ, ТАВ Македонија и авиокомпаниите кои оперираат во Македонија.
– Наша цел е да се вклучиме во европскиот сателитски систем и за тоа имаме целосна поддршка и како паневропска земја и како земја членка на Еуроконтрол. Практично на овој начин за неколку месеци треба да го започнеме процесот кој ќе значи осовременување на системот за контрола на летање и аеродромската инфраструктура во Македонија, изјави директорот на Агенцијата за цивилно воздухопловство Дејан Мојсоски на паузата на семинарот.
Тој нагласи дека во моментов се разгледува моделот на кој Македонија ќе може да аплицира и во разумен рок да добие насока за натамошна имплементација на системот.
– Станува збор за нова технологија која почна сериозно да се применува од пред една година и сметам дека ние се вклучуваме во право време, односно веднаш по дефинирањето на проблемот. Сега сме во првична фаза во која ќе се направат сите оперативни, технички и финансиски анализи и ќе се одредат неопходните човечки ресурси, рече Мојсоски.
Лук Титгат од Еуроконтрол посочи дека денешниот семинар го сметаат за особено значаен и додаде дека престојот во Скопје е пример за европската соработка за да се деблокира авионскиот транспорт секаде во Европа.
– Доаѓањето со авион во Скопје не беше секогаш лесно. Во минатото многу летови беа откажувани и имаше поплаки од многу патници. Затоа е неопходно да овозможиме патниците лесно и евтино да можат да ја посетуваат вашата земја. Подготвени сме да ги споделиме неопходните нови технологии и решението што го нуди глобалната сателитска технологија да биде достапно и кај вас, рече Титгат.
Тој истакна дека семинарот ќе претставува пример како може секаде во Европа да се воведе новиот систем.