„Извештајот на ЕК јасно укажува на општата опасност по македонските финансии и економија – загрижувачкото и перманентно зголемување на државниот и јавниот долг што ја доведува во прашање одржливоста на македонската економија.
ВМРО-ДПМНЕ континуирано се обидува да се утеши со констатацијата дека долгот е „умерен“.
Но, стопроцентниот пораст на долгот на Владата денес во однос на 2008 (20,6% на крајот на 2008, 40,8% денес) нотиран и во Извештајот покажува дека и за ЕК е јасно дека галопирачкото задолжување (заедно со долгот на општините 49% од БДП)реално се заканува да ја парализира и македонската економија, но и функционирањето на државната управа и локалната самоуправа.
Бидејќи Владата не презема мерки за намалување на динамиката на задолжувањето, туку со своите мерки ја забрзува, доколку Владата на ВМРО-ДПМНЕ остане на власт до крајот на мандатот, ќе стане неизбежно задолженоста да надмине 60% од БДП. Имајќи предвид дека најавените уставни измени го дефинираат овој праг, затворањето на ушите од татнежот на овие поразителни движења што сега го прават и премиерот Груевски, и вице-премиерот Ставрески и гувернерот Богов може да значи две работи:
– Дека е смислено сценарио за создавање неизбежната пролонгирана економска, финансиска и социјална драматична криза по заминувањето од власт на ВМРО-ДПМНЕ или
– Дека тие немаат капацитет да ги согледаат последиците што ги произведуваат.
Бидејќи ЛП не го потценува нивниот интелектуален капацитет, го извлекуваме заклучокот дека опасноста по македонската економија и држава произлегува од малигната политика на ВМРО-ДПМНЕ.
За Либералната Партија назадувањето во судството, медиумите, одвоеноста на државата од партијата на власт, отсуството на политички дијалог… се дополнително нотирање на задачите за Владата и сите политички субјекти. Прв чекор, притоа, е напуштањето на праксата на ВМРО-ДПМНЕ и неговите медиумски сателити да го користи извештајот за дневно-политички трик-пресметки со опозицијата. Сите ја носат одговорноста, а мнозинската одговорност ја ности власта“, се вели во соопштението на ЛП.