Јавното добро повторно се жртвува за приватниот интерес. Фирма блиска до Игор Јанушев, Генерален секретар на Владата, склучила договор со Државната лотарија вреден 14 милиони денари. Овие средства, наместо во касата на ЈСП-Скопје, ќе завршат во приватната фирма „Маратон Груп“, велат од Левица.
„Во 2017 година, тогашниот директор на ЈСП Јанушев ја укинал маркетинг службата на претпријатието и склучил договор со приватна фирма која добила право да го продава рекламниот простор на автобусите и постојките на ЈСП. Управител на фирмата е Љупчо Костовски, близок соработник на Јанушев.
За штетата да биде уште поголема, договорот е со времетраење од 10 години, ѝ овозможува на фирмата огромен профит, додека ЈСП скоро да нема апсолутно никаква корист од тоа. Претпријатието тоне во долгови, а скопјани добиваат сè понеквалитетни услуги.
Ова е пример за злоупотреба на јавните ресурси во корист на приватни интереси. Го повикуваме ДПМНЕ да го раскине овој штетен договор и да ги врати маркетинг ингеренциите на ЈСП. Само така ќе обезбедиме дополнителни средства за подобар јавен превоз и ќе го заштитиме јавниот интерес“, реагираат од Левица.