„Владата на Никола Груевски ги поскапе патарините од 20- 25 проценти. За да одите до Гевгелија и назад до Скопје, со амин на Владата, наместо 280 денари, отсега ќе треба да платите 360 денари.
И сето ова, Владата ни го „спакува“ кога Македонија тагува за 4-та трагично загинати граѓани на РМ, врвни професионалци и кога сите стравуваа од ескалација и несакани последици од протестите. Тимот на Груевски секогаш се „грижи“ вестите за разните поскапувања или скандали на неговиот тим, за лошите оценки од меѓународната јавност да одат заедно со масовни апсења, пронаоѓање дрога или протести и контра-протести.
На два месеци по изборите, наместо ветениот подобар и поквалитетен живот, добивме повисоки цени на бензините, струјата, цигарите, нови тензии и протести, незадоволни стечајци, изиграни професори, извисени фиктивно вработени. Розовите ветувања од познатите роуд шоуа на атрактивни дестинаци, редовно се без ефект“, пишува во соопштението на ЛДП.
„Премиере, не ги залажувајте студентите со еден ден бесплатен превоз, прифатете го предлогот на ЛДП за комплетно бесплатен превоз, не ги купувајте евтино пензионерите со бесплатно возење в недела. Сите овие наводни олеснувања, граѓаните дебело си ги платија и преплатија со од вас измислените нови давачки и со секојдневните поскапувања, кои драстично го загрозија животниот стандард. Не ни праќајте абери од светот дека само што не почнале да слетуваат авиони полни со инвеститори , зошто уште ни се свежи сеќавањата на инвеститорот од Тексас, глумецот-млекар и, се разбира, на светски познатиот малверзант Субрата Рој.
ЛДП бара премиерот и Владата да се откажат од луксузирањата и од голата пропаганда и, конечно, да се посветат на вистинско решавање на животните проблеми на граѓаните“, велат од ЛДП.