Уште еднаш се докажа дека Мицкоски и раководството на ВМРО-ДПМНЕ немаат ни малку државничко однесување а нивната единствена агенда се деструкциите, блокадите и дејствување на штета на државните и националните интереси, посочи портпаролката на СДСМ Богданка Кузеска на денешната прес-конференција.
„Илјадници граѓани масовно, гордо и достоинствено, во Крушево го чествуваа големиот национален празник 2ри Август – Денот на Републиката. На достоен начин беше оддадена чест и признание на славните предци од Илинденското востание и од народно ослободителната борба. Но и оваа како и години претходно ВМРО-ДПМНЕ на најголемиот државен празник, продолжи со недостоинствено, неодговорно и антидржавно однесување“, вели Кузеска.
Според неа делегацијата на ВМРО-ДПМНЕ, предводена од Александар Николоски, свесно доцнела на предвидената агенда, за потоа да ја напушти манифестацијата пред интонирањето на државната химна.
„Тоа е нечесно, неодговорно и срамно однесување. ВМРО-ДПМНЕ на Мечкин камен свесно го сквернавеше Денот на републиката, државниот празник го злоупотребуваше во дневно партиски цели. На тој начин ВМРО-ДПМНЕ погази по идеалите на Крушевскиот манифест, ги погази жртвите од Илинденското востание, дадени за слободна држава. Исто постапуваше и Христијан Мицкоски кој наместо да се појави на некое од најважните локации, тој Илинден го чествуваше приватно, осамен и опкружен единствено со едвај стотина негови поддржувачи“, истакна портпаролката на СДСМ Богданка Кузеска.
