Блокирањето на Собранието и репликите на пратениците од ВМРО-ДПМНЕ сами со себе не се за заштита на Македонија туку за заштита на криминалите и нафтените платформи на нивното раководство, обвини Васко Ковачевски од СДСМ.
Тој вели дека на 2. март оваа година е склучен нов договор за ископување на јаглен и јаловина во РЕК Битола со битолската фирма „Марковски компани“, која без оглас, во постапка на преговори, почнала со бизнисот вреден 5 милиони евра.
– Сопствениокт на фирмата, Борче Марковски, кој е конзул во Белорусија, е близок пријател на Сашо Мијалков. Тој и претходно за ископување на јаглен и јаловина, имал тендери од над 60 милиони евра. Оваа фирма е тесно поврзана со ВМРО-ДПМНЕ, рече Ковачевски.
Во врска со деблокадата на Собранието, Ковачевски рече дека наскоро ќе се одбере претседател на Парламентот, согласно Уставот и Деловникот и дека ќе одговараат сите кои се огрешиле пред Законот.
– Очекуваме да преовладува свеста и пратениците од ВМРО-ДПМНЕ да овозможат да функционира Собранието. Имаме мнозинство од 67 пратеници. Црните сценарија на Груевски не поминуваат кај граѓаните, рече Ковачевски.
Тој кажа дека засега не е најавена никаква средба на лидерите на парламентарните партии, ниту пак е почната најавената координација со претседавачот Трајко Вељаноски.
Александар Тодески