Заменик-претседателот на Владата на Република Македонија задолжен за европски прашања, Фатмир Бесими одржал координативен состанок со претставници на ЕУ, повеќе земји и организации донатори во Република Македонија, на која се разговарало за миграцијата и планови и начини за справување со предизвиците од актуелната ситуација во земјата, регионот и Европската Унија, соопшти денеска Секретаријатот за европски прашања (СЕП).
На состанокот, на кој учествувал и министерот за внатрешни работи Митко Чавков, се наведува во соопштението, биле презентирани плановите на Владата на Република Македонија за справување со бранот мигранти од земјите на Блискиот исток и Африка. Притоа, биле изложени и конкретни проценки на потребите, од кои дел веќе се обезбедуваат од сопствени извори и ресурси на земјата, како и преку поддршка од неколку меѓународни организации, активни во оваа област.
Од страна на присутните претставници на ЕУ, земји донатори и меѓународни организации, била поздравена иницијативата за одржување ваква средба, особено што се одржува во пресрет на министерскиот состанок на ЕУ во Луксембург, на кој се разгледуваат конкретни планови на Унијата за справување со ситуацијата.
Како што стои во соопштението, било договорено состанокот да прерасне во редовна месечна форма на координација на Владата и донаторската заедница на тема миграција, за што веќе се утврдени и конкретни чекори и механизими на соработка.
