Министерството за транспорт и врски објави конкурси за изработка на идејно архитектонско – урбанистички решенија за уредување плажи на Дојранското и на Преспанското Езеро. Се бараат решенија за уредување 500 метри плажа на Дојранско Езеро во централното градско подрачје и 100 метри плажа вон централното подрачје, како и за 500 метри плажа на Преспанско Езеро во населбата Стење и дополнителни 100 метри во населбата Сливница.
Од Министерството за транспорт информираат дека основно начело при изработка на архитектонското-идејно решение треба да преставува концептот на заштитата на природната средина и зачувување на автентичноста на обележја специфични за тој регион. Потребно е на плажите да има планирана песочна површина која би се изнивелирала и попесочила со соодветен автохтон песок, да се почитува постојното зеленило и да се дооформи со автохтони видови, хортикултурно и партерно да се уреди со пооставување клупи, фонтани, детски игралишта, пешачки патеки од монтажно – демонтажни материјали.
Сервисниот пункт треба да ги опфати шанк со кабина за музика со спецификација на опрема, место за озвучување, санитарен јазол, тушеви, соблекувални, прирачна остава за чадори, лежалки и други реквизити. Треба да биде обележан просторот за капење во езерото со бови заради заштита на капачите од пловни објекти и да се предвиди место за служба за спасување, а местото за седење на спасителот да се осмисли во духот на целата плажа, а на плажата треба да се предвидат места за информативни паноа, бежичен интернет и други погодности за забава и престој.