Првиот од 66-те приговори на ВМРО-ДПМНЕ за општина Центар не е изгласан. Трае „жешка“ расправата за приговорот за избирачкото место 2844.
Овластениот предлагач на ВМРО-ДПМНЕ, Илија Илијовски посочи дека е забележано агитирање од страна на СДСМ, дека не е повикана полицијата за да ги отстрани лицата и дека на избирачите не им било дозволено да гласаат и им биле барани документи за идентификација. Претседателот на ДИК, Борис Кондарко праша кои се тие лица и кој вршел притисок.
„Во записникот не пишува дека некој вршел притисок ниту на кого вршел притисок. Ова е вербална и паушална забелешка. Полицијата била во кругот на училиштето. Не знам што има ВМРО-ДПМНЕ против присуството на полицијата“, рече Кондарко.
Илијовски посочи дека отпосле било утврдено дека лицето е Ненад Шиповиќ, на што Кондарко забелжа дека ова изгледа „како после свадба, тапани“.
Жестока дебата имаше меѓу Кондарко и членот на ДИК, Сајковски.
Кондарко рече дека сите знаат што се случувало во Центар и праша дали е грев на претставниците што откриле дека нешто не е во ред и праша дали сака ВМРО-ДПМНЕ нешто да стави под тепих.
Претставникот на ВМРО-ДПМНЕ рече дека е навреден, а Сајковски и Кондарко за кратко ја напуштија седницата и со неа продолжи да раководи Супхи Јакупи.