Безброј полемики, анализи, изјави и прес – конференции протекоа низ медиумите во однос на тоа дали летната туристичка сезона во Охрид била успешна или не. Официјално ниту Заводот за статистика ниту Општина Охрид немаат податоци за јули и август. Но, она што е забуна за пошироката јавност се бројките кои излегуваат од институциите. Од Одделението за односи со јавност пред неколку дена рекоа дека вкупниот број на туристи заклучно со 30 јуни е зголемен во однос на минатата година.
Годинава вкупниот број на туристи во Охрид заклучно со 30 јуни е зголеменза 2,6 % во однос на минатата година. Бројот на странски гости е зголеменза 6,5 % а бројот на домашни гости е намален за 4, 7% – рекоа од Одделението за односи со јавност при Општина Охрид.
Истите бројки ги кажа и градоначалникот на Охрид, Никола Бакрачески на прес – конференцијата заедно со заменик министерот за економија Христијан Делев кога се жалеше на новинарските прилози за Охрид.
Вчера пак, Ѓоко Апостолов од Секторот за туризам и локален економски развој при Општина Охрид рече дека општината се уште нема официјални податоци за летната сезона туку дека податоците со кои располагаат се заклучно со мај.
Согласно податоците кои ги имаме заклучно со мај имаме вкупно 10,1 % зголемување на бројот на туристи односно 18 % зголемување на странските туристи и 3,1 % намалување на домашните туристи – рече Апостолов.
Наплатата на туристичката такса е помала во однос на минатата година иако бројот на туристи и бројот на ноќевањаспоред официјалните податоци е поголем заклучно со мај. Според Одделението за односи со јавност наплатата била помала за 10% за месеците април, мај и јуни, а според Апостолов за помалку од 1 % за првите шест месеци од годината. По изјавата на Апостолов, Одделението за односи со јавност реагираше и се корегираше околу информациите кои претходно беа пуштени во јавност.
Во врска со бараната информација за податоците од наплатата на туристичката такса, Ве информираме дека релевантни се информациите кои ги добивте денес од Ѓоко Апостолов од Секторот за туризам и локален економски развој, во форма на изјава.
Недоразбирањето настана заради тоа што Државниот завод за статистика податоците ги добива од Секторот за туризам и локален економски развој и понатака ги обработува и ги доставува со задоцнување – рекоа од кабинетот на градоначалникот.
Сето ова остава можност за сомнеж на реалната состојба со бројот на туристите. Тоа повлекува повеќе прашања што се нејасни за јавноста. Дали официјалните бројки се штелуваат и дали јавноста е запознаена со реалниот број на туристи во најголемото туристичко место во Македонија?
Ф.Ј.