Кој се обидел да ѝ избега на правдата во земјава, судејќи по бројките, се чини дека успеал. За само две години од државата избегале седум осудени и обвинети лица.
Одговорност за тоа нема. Вината во јавноста со изјави и дописи постојано си ја префрлаат полицијата, судот и затворите. Некои од избеганите, како Никола Митровски Кољо и Александар Василевски Нинџа не ги наоѓаше полицијата, туку се пријавуваа самите.
![](https://a1on.mk/wp-content/uploads/2019/10/igor-spasov1-1024x565.jpg)
Поранешниот специјалец Игор Спасов е седмиот во низата лица кои успеале да ѝ избегаат на правдата за период од само две години. Нему за убиството на Мартин Нешкоски му остануваат да одлежи уште 7 години и 3 месеца. Одговорност за неговото бегство нема.
Во оваа низа е и Дејан Давидовски Дешо, кој избега во Шведска. Тој е обвинет за организираниот напад на Собранието на 27 април 2017 година. За Давидовски беше распишана меѓународна потерница, но Шведска одби да го екстрадира.
На списокот избегани од правдата е и Никола Војминоски, кој беше осуден за обид за убиство на Зијадин Села на затворска казна од 13 и пол години. Полицијата не го пронајде дома каде беше во куќен притвор.
Експремиерот Никола Груевски за една недела ќе направи една година откако под сè уште неразјаснети околности преку Албанија излезе од државата и избега во Унгарија, а Унгарија одби да го екстрадира бидејќи доби политички азил. Одговорност и за ова бегство нема, а обвинителката Вилма Русковска соопшти дека констатирале пропусти кои не се кривично дело. Прашањето на кое јавноста очекува одговор е зошто никој не одговарал ниту за пропустите.
Во 2017 година избегаа ексначалникот на петтата управа во МВР, Горан Грујевски, и ексразузнавачот Никола Бошкоски. Ова се случи откако десетина дена се чекаше да стане правосилна одлуката за притвор. СЈО ги обвини во предметот за масовното прислушување „Таргет Тврдина“. Грујевски дополнително е обвинет и во „Тврдина 2“ и „Трезор“, а осомничен во истрагата „Странски служби“. И двајцата побараа и очекуваат азил во Грција, а Врховниот суд одби да ги екстрадира.
Од државата успеа да избега и Газдата на фирмата „Секјуриком“, Австриецот Волфганг Гампер, кој ја напушти државата со одземен пасош како осомничен соизвршител во местење на 11 милионскиот тендер за одржување на Владата.
![](https://a1on.mk/wp-content/uploads/2019/11/Monstrum-1024x637.png)
Листата на бегалци од правдата има долга историја и години наназад. Алил Демири и Африм Исмаиловиќ, обвинети за маскарот кај Смилковското езеро полицијата никогаш не ги најде. Иако има по нив распишано меѓународна потерница, тие се недостапни за органите од 2012 година.
Се чини дека една од најдолгите неуспешни потраги на бегалец од правдата е за Драган Даравелски. Поминаа 17 години откако поранешниот директор на македонската Царина, избега во Србија. Тој беше осуден за злоупотреба на службената положба во Царината во периодот од 1999 до 2002 година во вредност од приближно 1,5 милион евра. Додека во екстрадициски притвор чекаше испорачување во Македонија, му беше одобрено српско државјанство.