Наместо да понуди решенија кои се видливи, власта најави двегодишен план за справување со аерозагадувањето. Заменик министерот за животна средина, како раководител на интер-ресорката група за справување со загадувањето Јани Макрадули кажа дека станува збор за план со кој очекувал загадувањето да се намали за 50 проценти, ама после две години.
Власта одамна требаше да има план, а ова е само обид да се помине зимата без критики, со оглед дека е јасна неспособноста да се справат со загадувањето. Токму во овој ресор има министер кој не кажал ниту збор за загадувањето ниту пак јавноста виде некаков план како да го реши. Власта, а тогашна опозиција имаше најсилни критики токму за загадениот воздух и ветуваше дека има план и мерки за итно поправање на ситуацијата, но се остана исто.
Сега, според планот кој го претставуваа Јани Макрадули и Бујар Османи се очекуваат средства од домашни донатори за да се спроведе истиот – како на пример од Шведска, Јапонија и САД. Макрадули не беше конкретен за колкави средства станува збор.
„Не сакам да лицитирам“, рече Макрадули, но спомена дека шведската агенција СИДА треба да издвои 2,5 милиони евра со кои се очекува да се поправат мерните станици кои не функционираат и да се обноват останатите.