Од Коалицијата „Менуваме“ денеска реагираат на, како што велат, свесно кршење на законот, Конвенцијата за правата на лицата со хендикеп на ОН и Уставот на Република Северна Македонија, со тоа што на лицата со телесна попреченост не им се дозволува да влезат во возила на ЈСП со своите кучиња кои им помагаат во движењето.
– Денеска на Александар Велевски, кој е лице со телесна попреченост во количка и неговиот четвороножен сервис куче Бен, не им било дозволено да го користат јавниот превоз. По наредба на Градот и градоначалничката донеле одлука лицата со попреченост кои имаат куче сервис да не бидат пуштени во јавниот превоз т.е. во возилата на ЈСП, се вели во денешното соопштение од Коалицијата Менуваме.
Од оваа Коалиција прашуваат дали има и каква е таа одлука, како и зошто таа не е објавена на страната на Градот Скопје.
Коалицијата Менуваме јавно бара објаснување од Градот Скопје и градоначалничката да се изјаснат за настанатата ситуација, а најавува дека ќе се обрати до канцелариите на ОН, ОБСЕ, и на Делегацијата на ЕУ во земјава.