Мојата визија е Кавадарци да стане модерен европски град, со одлична инфраструктура, со чист воздух и здрава животна средина, урбано целосно уреден, привлечен за турустите и економски силно развиен, каде секој граѓанин ќе може достоинствено да живее. Ова го истакна денеска на прес-конференција Бетиане Китев, кандидат за градоначалник на Кавадарци од редовите на СДСМ и коалицијата.
– Со сите сили ќе се борам општина Кавадарци да стане лидер во транспарентност, отчетност и ефикасност на администрацијата. Општината и претпријатијата ќе бидат вистински сервис на граѓаните. Време е Кавадарци да го добие сјајот кој го заслужува и од политички, но пред се од економски и социјален аспект. На Кавадарци му се неопходни промени, нагласи Китев.
Граѓаните на Кавадарци, додаде, заслужуваат да имаат многу повисок животен стандард, посредени улици, поубави паркови, нови градинки, нови спортски терени и почист воздух.
– Заедно здружени може да направиме многу за нашиот град, порача Китев.
Напредокот на Кавадарци и подобрувањето на животот на граѓаните рече дека отсекогаш биле примарна цел во неговата политичка кариера.
– Како советник во општината и особено како пратеник во Собранието на Македонија, секогаш со искрена желба и со сите сили се борев за Кавадарци и за кавадарчани, рече тој и додаде дека за таа цел одлучил да придонесе за подобрување на животот во Кавадарци и ја прифатил кандидатурата за градоначалник.
Силно верувам, додаде, дека Кавадарци со напорна и посветена работа, но и со искрени и некорумпирани луѓе на чело на општината, може да стане еден од најразвиените градови во Македонија.