Јове Кекеновски е исклучен од ВМРО-ДПМНЕ. Во телефонски разговор за А1 ја потврди информацијата и рече дека постапката за негово исклучување била започната на 27 или 28 март.
„Фракционерско дејствување е објаснувањето. Што да ви речам“, изјави кратко Кекеновски.
Според него главна причина за исклучувањето е различниот став кој тој го презентира јавно но и одлуката да се оформи форум на „Слободоумни патриоти“ кој не се согласува со политиките на актуелното раководство предводено од Никола Груевски.
Дел од медиумите блиски до власта одлуката да се исклучи Кекеновски ја објаснуваат со фактот што тој го нарушил угледот на ВМРО-ДПМНЕ и делувал спротивно на политиките и определбите на партијата.