Кавга меѓу Орце Камчев и обвинетиот Бојан Јовановски-Боки-13 имало пред зградата на Кривичниот суд, за време на спроводот на Јовановски од затворот во Шутка и пристигнувањето на Камчев за да сведочи по предлог на обвинетата Катица Јанева. За инцидентот слушнала и дел од одбраната, која дознала од свои колеги. Ирена Фрчковска која е бранител на Катица Јанева, за „А1он“ вели дека станувало збор за вербален, но не и физички напад.
„Јас не бев присутна, но слушнав од колегите дека надвор имало некое карање, вербална расправија. Јанева беше донесена подоцна, нема никаква поврзаност со тоа“, посочи Фрчковска.
Директорот на затворот во Шутка, Есад Рахиќ, за „А1он“ вели дека слушнал за наводен инцидент, но тоа за него не е релевантна информација бидејќи не е потврдена, односно дека е шпекулација.
„Бојан сега е донесен во притовр. Вработените кои ги правеа спроводот пишуваат извештаи, кога ќе ја видам белешката би знаел дали имало или немало инцидент. Во понеделник ќе имаме информација“, посочи Рахиќ.
Дел од медиумите објавија дека полицијата спречила физички инцидент меѓу Јовановски и Камчев, но засега, овие информации не се потврдени.