Агенцијата за млади и спорт во изминатиот период реализираше едукативно-информативни настани како дел од кампањите „Насилството раѓа насилство. Сопри го, не го разгорувај“ и „Почитувај ги сообраќајните прописи, почитувај го животот. Не пиј додека возиш!“.
-Во склоп на едукативно-информативните настани, беа посетени средните училишта во Градот Скопје, „Здравко Цветковски”, „Арсени Јовков”, „Браќа Миладиновци”, „Марија Кири Склодовска” и „Михајло Пупин”, од страна на членовите на Националниот комитет за спречување на насилниот екстремизам и борба против тероризмот и вработените од Секторот за превенција при СВР Скопје од Министерство за внатрешни работи, соопштија денеска од Агенцијата.
Особен интерес кај средношколците од прва до четврта година имаше за делот во врска со последиците од насилството меѓу средношколците, како и причините за појава на истите.
Имајќи го предвид зачестениот број на сообраќајни несреќи предизвикани од млади лица, посебно внимание беше посветено на темата за подигнување на свеста за сообраќајната култура кај младите.
Во наредниот период кампањата ќе продолжи со уште позасилено темпо и со нови настани во координација со МВР и Националниот комитет.