Како се крпи скинатиот буџет и какви се последиците од она што власта им ги направи на приватните пензиски фондови беше темата на која денеска прес-конференција одржа Зоран Јовановски од редовите на СДСМ.
-Се сеќавате дека во јули годинава беше изменет законот и власта ги натера приватните пензиски фондови предвреме да продадат еврообврзницa своевремено издадена од Република Македонија. Ваквата законска промена власта не можеше да ја објасни. Зошто приватните пензиски фондови да можат да имаат државни хартии од вредност издадени од Република Македонија на домашниот пазар, а да не можат да имаат државни хартии од вредност издадени од Република Македонија во странство. Ова не е академска нелогичност, владата предизвика конкретна финансиска штета за преку 300 илјади граѓани кои се во вториот пензиски столб. Заради потегот на власта, 300 илјади граѓани ќе имаат пониски пензии во споредба со пензиите што ќе ги имаа ако приватните пензиски фондови ја сочуваа еврообврзницата до крај, наместо да ја продадат предвреме – рече Јовановски.
Тој додаде дека власта ги натерала приватните пензиски фондови да ја продадат предвреме обврзницата за да ги пренасочат парите од продажбата за крпење на скинатиот буџет.
-Да резимираме. Со овој потег и со потегот на гувернерот, во скинатиот буџет на државата годинава се слеаја повеќе од 221 милиони евра и така беше закрпена дупката за оваа година – подвлече Јовановски.
