За вчерашната акција на Специјалното обвинителство во Централниот регистар со писмена реакција излезе и обвинителката Катица Јанева. Таа пишува дека наредбата за одземање на документација од Централниот регистар следува по барање на СЈО, откако Централниот регистар во рок од 30 дена не постапил по нивните барања.
„Наредбата е издадена по барање на ова Јавно обвинителство, откако Централниот регистар во рок од 30 дена не постапи по нашето барање и единствено не извести дека барањето било нејасно, иако во неколку наврати имаше телефонска комуникација со јавни обвинители и истражители во насока на појаснување што се е предмет на нашето барање.
Ве известуваме дека во текот на вчерашниот ден (вечерта) воспоставена е соработка со Централниот регистар и доставен е дел од бараната документација. Имајќи предвид дека се работи за голем обем на документација, во деновите што следат ќе биде одземена целокупната документација која е наведена во наредбата за одземање на предмети, за што благовремено ќе Ве информираме. Воедно изразуваме уверување дека добро воспоставената соработка со Централниот регистар ќе продолжи и во иднина“, се наведува во соопштението од СЈО.
Вчера пред крајот на работното време, истражители на СЈО биле во Централниот регистер да побараат документи кои потребни за истрага.
По нивното заминување стигнала дојава од вработен во Централниот регистер дека имало обид за изнесување на дел од документацијата надвор од зградата на Централниот регистер. Врз основа на оваа дојава СЈО побарало судски налог за полициска асистенција.