Министерот за транспорт и врски Миле Јанакиески денеска апелираше до пратениците од македонското Собрание разумно да ги разгледаат сите проблематични ситуации кои би настанале со неусвојувањето на буџетот за следната година.
Одговарајќи на новинарско прашање за „Македонски железници“, министерот Јанакиески истакна дека доколку не се донесе буџетот, ќе се доведе во прашање тековната исплата на платите во Железница.
– Една од ситуациите е неисплатата на платите на вработените во Железници бидејќи месечно Министерството за транспoрт и врски исплаќа минимум по 18 милиони денари за надоместокот во делот на патниот сообраќај. Доколку не се усвои буџетот тоа не би можеле да го направиме со што се доведува во прашање тековното исплаќање на платите во Железницата, појасни Јанакиески.
Нагласи дека сите мерки што ќе се преземат, а се однесуваат на Железници, ќе бидат носени во соработка со синдикатите.
– Внимателно се следи ситуацијата во Македонски железници така што сме во постојан дијалог со синдикатите и мерките ќе ги структурираме согласно разговорите и потребите за стабилно функционирање на Македонски железници, рече Јанакиески.