На ексминистерот за транспорт и врски, Миле Јанакиески незаконски му бил продолжуван домашниот притвор за предметите „Организатори на 27 април“ и „Шпански скали“. Оваа одлука Европскиот суд за човекови права во Стразбур ја донесе денеска, а во неа е наведено дека имало недостиг од доволни причини на неговото лишување од слобода и недостиг од навремено разгледување на жалбите кои што се поднесувани за притворите.
„Утврдена е повреда на член 5 став 3 поради немање доволно причини за лишување од слобода на жалителот и повреда на член 5 став 4 поради недостиг на ‘брзо’ преиспитување на лишувањето од слобода на жалителот“, стои во пресудата на Европскиот суд за човекови права.
Судот освен повреда на човековите права, утврдил и дека ексминистерот има претрпено штета поради притворите, за што му е одредена штета од 3.900 евра.