На маргините на либералната лидерска средба на Либералната мрежа на ЈИЕ (ЛИБСЕЕН), во Осијек, Хрватска, претседателот на ЛП и пратеник, Ивон Величковски се сретна со претседателот на ХНС, г-ѓа Весна Пусиќ, министер за надворешни работи и европски интеграции на Хрватска.
На средбата беа разменети погледи за тековната политичка состојба во Македонија и во регионот и за можностите за соработка на двете либерални партии.
Евро-интегративниот процес беше една од главните теми на средбата на која претседателот Величковски ја изрази и благодарноста за досегашната хрватска поддршка на македонските евро-интегративни процеси. Притоа, тој подвлече дека таа не е само политичка, потсетувајќи на достапноста на хрватските искуства и техничките документи кои се од значење и за Македонија и воопшто за земјите-кандидати од регионот.
Претседателот Пусиќ потенцираше дека европските интеграции се природна заложба на либералите, изразувајќи го очекувањето дека ваквиот пристап на Хрватска ќе го помогне интегративниот процес на регионот и покрај тековните предизвици со кои се соочува ЕУ.
Пусиќ и Величковски се согласија дека соработката меѓу либералните партии во регионот е можност и за унапредување на активностите и видливоста на ЛИБСЕЕН, но и за практичен придонес во поддржувањето на евро-интегративните процеси на земјите од ЈИЕ.