Претседателот Ѓорге Иванов денеска прими акредитивни писма на новоименуваните амбасадори на Република Ангола и на Хашемитското Кралство Јордан, за Република Македонија, Дијакенга Серао, и Амјад Одех Адаилех.
Македонскиот претседател им честита за изборот и им посака успех во извршувањето на должноста. На средбата со амбасадорот на Ангола, според соопштението Кабинетот на Претседателот, е констатирано дека билатералните односи се недоволно развиени и е изразена подготвеност за интензивирање на политичкиот дијалог, како и интерес за унапредување на соработката во повеќе области, пред сè на економски план.
– Ценам дека постојат и бројни области во кои можеме да ја зацврстиме соработката, за што е потребно почеста комуникација, испитување и запознавање со потенцијалите на двете земји, посветеност и искористување на истите, порачал во поздравниот говор Иванов.
Амбасадорот на Ангола изразил надеж за отворен и плоден дијалог и се заложил за зацврстување на пријателските односи меѓу двете земји.
На средбата со амбасадорот на Јордан, е укажано на потребата од почести контакти на државно ниво и од продлабочување на економската соработка и зголемување на трговската размена. Воедно, беше афирмиран и интересот за унапредување на соработката во науката, културата и образованието.
– За тоа е потребно да го интензивираме политичкиот дијалог и контактите на сите нивоа, да работиме на заемно претставување на потенцијалите за соработка и на унапредување на правната рамка што ќе создаде основа за посакуваната соработка меѓу двете држави, истакнал македонскиот претседател.
Посочувајќи дека Република Македонија е успешен пример за многу земји во развој, амбасадорот Адаилех нагласил дека ќе вложи максимални напори за унапредување на билатералната соработка меѓу двете држави, особено во сферата на трговската размена и инвестициите, туризмот и културата.