Кабинетот на претседателот на Република Македонија Ѓорге Иванов, потврди дека е примено писмо од претседателот на Република Бугарија, Росен Плевнелиев, што утрово го објавија бугарските медиуми.
– Претседателот Иванов искажува задоволство од позитивниот одговор на неговите иницијативи од страна на бугарскиот колега, што е позитивен исчекор во настојувањата за градење на односи на добрососедство.
Воедно, претседателот Иванов изразува задоволство што иницијативите за заедничко чествување на одредени настани од историјата, како и преточувањето на декларацијата од 1999 година во Договор за добрососедство и пријателство ќе почнат да се реализираат во најскоро време“, велат од Кабинетот на македонскиот претседател.
Претходно, бугарскиот претседател Плевнелиев преку писмо ја прифати понудата од македонскиот претседател Иванов, декларацијата за соработка од 1999 година да биде преточена во нов Договор за добрососедство.
„Уверен сум, дека тој акт ќе даде дополнителен стимул за активизирање на соработката меѓу нашите две држави во сите области“, посочил во писмото бугарскиот претседател.