Со денешниот втор круг гласање од локалните избори очекуваме зад нас да оставиме уште еден успешно завршен изборен процес. Очекувам дека и овој пат граѓаните ќе излезат масовно и ќе им дадат што поголем легитимитет на тие што следните 4 години ќе се грижат за локалните потреби на граѓаните.
Ова го изјави претседателот на Република Македонија Ѓорге Иванов, кој денеска заедно со неговата сопруга и синот гласаа на избирачкото место 2859, во Средно училиште „Јосип Броз Тито“.
– Вообичаено вечер победниците слават, а поразените треба да размислат зошто добиле такви изборни резултати и да се подготват веќе за следните избори бидејќи демократијата е постојан циклус на учење учествувајќи во неа, рече Иванов, изразувајќи надеж дека изборите ќе поминат во најдобар ред, како што доликува, нагласи, на една земја-кандидат за членство во ЕУ.
Претседателот Иванов нагласи дека по изборите, на сите што се вклучени во политиката целата енергија ќе биде насочена кон стратешки цели и на што подобро утре на сите што живееме во Република Македонија.