Претседателот на Република Македонија Ѓорге Иванов го откажа Самитот на шефови на држави и влади на земјите вклучени во Процесот за соработка во Југоисточна Европа и Форумот на Дијалогот меѓу цвилизациите што требаше да се одржат викендов во Охрид и Стуга.
Иванов попладнево на прес-конференција во вилата „Водно“ изјави дека државниот интерес и достоинството на Македонија го обврзале да ја донесе одлуката и оти Република Македонија постапи целосно во согласност со основачките документи и правила, и како одговорен претседавач со ПСЈИЕ.
– За жал старите балкански предрасуди и комплекси повторно заживеаја во пресрет на Самитот. Нема да дозволам преку грбот на Македонија да се прекршуваат старите балкански предрасуди и да се поткусуруваат интересите на балканските држави, а цената да ја плаќа Македонија, рече претседателот Ѓорге Иванов.
Одлуката доаѓа по откажувањето на учеството и од страна на албанскиот претседател, Бујар Нишани како реакција на тоа што покана не стигна до претседателот на Косово, Атифете Јахјага. Целата ситуација кулминираше вчера по изјавата на потпретседателот на Владата на Србија, Александар Вучиќ кој изјави дека тие не го условиле учеството на Самитот со неприсуство на Јахјага. Тој кажа дека тоа е одлука на македонскиот претседател Иванов.
Претходно по грчкиот претседател Каролос Папуљас, учеството го откажа и бугарскиот претседател Росен Плевнелиев.