Претседателот на Република Македонија, Ѓорге Иванов, денеска и утре во Братислава, ќе учествува на 18. Самит на шефови на држави и влади од Централна Европа, чиј домаќин е претседателот на Словачка Република Иван Гашпарович.
Деветнаесет претседатели и домаќинот ќе дискутираат за клучните политички, економски, социјални и безбедносни прашања поврзани со закрепнување на регионот и Европа во посткризниот период. Во тој контекст, шефовите на држави и влади ќе разговараат за можностите за враќање на одржливиот раст, за изнаоѓањето начини за спречување на слични економски и финансиски кризи во иднина, како и за улогата на новите земји-членки на ЕУ во посткризното закрепнување.
Мотото на самитот е „Стратегија за раст за посткризно закрепнување“.Потврдено е учеството на Австрија, Романија, Црна Гора, Естонија, Хрватска, Украина, Полска, Латвија, Бугарија, Молдавија, Унгарија, Србија, Албанија, Босна и Херцеговина, Словенија, Чешка, Косово и Словачка. Свое присуство потврди и претседателот на Европскиот совет Херман Ван Ромпуј.
Претседателот Иванов, покрај обраќањето на пленарната сесија, ќе оствари и повеќе билатерални средби меѓу кои со претседателите на Полска, Молдавија, Црна Гора и Украина.
Првиот самит на шефови на држави и влади на Централна Еропа се одржа во Чешка во 1994 година. Македонија беше домаќин во 2008 година на 15. самит.