Ако важеа спортските правила во Европската унија досега Македонија ќе беше членка на Унијата, порача македонскиот претседател Ѓорге Иванов на неформалната промоција во Скопје на Европското првенство во кошарка 2013 што во септември ќе се одржи во Словенија.
– Она што го прават спортистите се надеваме дека ќе го прават и пилитичарите. Ќе ги обединуваат луѓето, ќе им носат многу радост и просперитет. Замислете Европа да има свој тим и да учествува на Олимпијада колку медали би добила, рече Иванов.
Посочи дека знае какви домаќини се Словенците и оти воопшто не се сомнева во одличната организација на Европското првенство во кошарка во септември.
– Се надевам дека Словенија ќе може да покаже како знаат спортистите да се наптреваруваат и да победуваат. И ние нема да останеме должни и ќе знаеме да се покажеме во најдобро светло, потенцира Иванов.
Словенечкиот претседател Борут Пахор, кој престојува во дводневна официјална посета на Македонија, порача дека е сигурно оти еден ден Европа ќе има своја репрезентација.
– Се надевам дека тоа ќе се случи уште за време на нашата генерација. Сигурен сум дека тогаш во репрезентацијата ќе членуваат и спортистите од Македонија, рече Пахор.
Тој ги повика Македонците во септември да ја посетат Словенија и да уживаат на спортските спектакли на Европското првенство во кошарка.
– Повелете дојдете на тој спектакал. Спортот ги здружува луѓето и им овозможува да победат најдобрите. Знам дека Македонците имаат големи амбиции на ова првенство, но на пат ви стојат Слвенците и Грците. Можете да имате илузии иако ние ќе направиме се да победиме, истакна Пахор.