„Мојата визија и мото отсекогаш биле „Европскиот мир е неостварлив без балканскиот мир“. Сметам дека обединувањето на европскиот континент и напорите за остварување на визијата за „Европа обединета во различностите“ може да се оствари преку примена на моделите на мултиетнички соживот кои постојат на Балканот, особено македонскиот модел, рече претседателот на Република Македонија, Ѓорге Иванов, пред учесниците на форумот „Верско и културно историско наследство како основа за интензивирање на соработката меѓу државите“, кој се одржува во Мостар.
Македонскиот модел, рече претседателот Иванов, е модел на мултиетничка демократија која подразбира интеграција без асимилација.
„Верувам дека ваквите позитивни балкански искуства можат да помогнат во обликувањето на европската иднина. Република Македонија живеела
и живее во светот на различноста, почитувајќи го она што ни е оставено во наследство. Животот не научи на соживот, толеранција и меѓусебно разбирање и помагање. На тоа не потсетува и она што ние на Балканот го знаеме како капиџик, во вистинска смисла на зборот“, рече Иванов.
„Денес, кога се чувствува се поголема нетолеранција, религиозен фундаментализам и исклучивост, во време кога многу општества се соочуваат и се борат со длабока криза на некои морални вредности, верувам дека токму дијалогот меѓу религиите и културите е основниот инструмент за надминување на предрасудите и стравот, за зближување и разбирање меѓу луѓето, без разлика на религијата кон која припаѓаат“, оцени Иванов.