Денеска е дваесетиот и последен ден кога мандатарот Никола Груевски, лидер на ВМРО-ДПМНЕ, треба да каже дали успеал да обезбеди парламентарно мнозинство од 61 пратеник кое ќе гласа за новиот владин кабинет.
ДУИ по осумчасовно заседание во Мала речица не успеа да постигне договор за коалиција со Груевски. Според партиски извори мнозинството се спротивставило на предлогот на Ахмети повторно да се коалицира со Груевски. Тројцата потпретседатели на ДУИ синоќа беа на консултации на Бихачка. Ахмети вели дека тој е лидер и знае каде му се потпретседателите и со какви задачи.
„Состојбата е малку поделикатна за одлучување. Разговараме со сите политички партии, прашање на одлука во ДУИ е која опција ќе ја избереме. Во ДУИ правиме анализи за и против за аргументите за секоја опција, сè уште немаме одлука, претседателот прави анализи со членовите на партијата во сите нивоа и со луѓе кои не се од ДУИ, но моментално немаме одлука“, изјави Бујар Османи, портпарол на ДУИ.
Од ВМРО-ДПМНЕ комплетен молк. Од она што до сега се знае, Груевски имал само една средба со Али Ахмети, на која, според оскудните соопштенија по средбата, не станало збор за формирање заедничка влада, туку само се констатирале состојбите по изборите.
Ден по средбата со Груевски, Ахмети во штабот на СДСМ се сретнал и со Зоран Заев, а според соопштенијата се разговарало за ставовите што двете страни ги застапуваат во овој период, без навлегување во детали или разговори за одделни конкретни прашања.
Доколку Никола Груевски не договори парламентарно мнозинство, треба да го врати мандатот,а што ќе се случува потоа, различни аналитичари и универзитетски професори различно го толкуваат Уставот.
Некои велат дека мандатот треба да го добие Зоран Заев, од СДСМ како партија која освои најмногу гласови на изборите по ВМРО-ДПМНЕ, некои дека повторно Иванов треба да го врачи мандатот на некој од ВМРО-ДПМНЕ, а некои велат дека треба да се оди на нови избори, затоа што не можело оној кој изгубил на изборите да биде мандатар.