На седницата на Советот на Град Скопје, советничката од редовите на ВМРО-ДПМНЕ, Ирена Попова извести дека од денеска повеќе нема да биде дел од нивната советничката група. Како што рече Попова, отсега ќе делува самостојно.
„Ќе дејствувам независно, а вие слободно можете да продолжите со заканите кои ги испраќате до мене изминативе денови. Не се плашам и ќе продолжам да работам за она што го ветив на граѓаните во кампањата, а тоа е модерно Скопје“, рече Попова, која по нејзиното излагање, доби аплауз од градоначалничката Данела Арсовска.
Ова е втор ваков случај, откако пред речиси два месеци, ВМРО-ДПМНЕ и коалицијата изгубија уште еден советник, Александар Трајковски од ГРОМ.
По ваквите настани, ВМРО-ДПМНЕ останува со 16 советници, СДСМ 12, ДУИ има 5 советнции, а Левица 4, ЛДП и Зелен хуман град имаат по 2 советника, а по еден Алијанса за Албанците и Алтернатива. Од денеска, во Советот има и два независни советника.
