Граѓанската Иницијатива против задолжителна вакцинација доставена до Собранието ќе се разгледува после изборите. На денешната седница на Комисијата за политички систем иако веше ставена на дневен ред, истата се одложи поради немање кворум за работа. Пратеникот Чедомир Саздовски кој ја водеше седницата образложи дека е изборен период и дека иницијативата ќе се разгледува на 6 или 7 мај.
Подносителите на иницијативата бараат измени на законот за здравствена заштита од заразни болести, со што наместо задолжително, бараат вакцинирањето да биде по избор на родителот.
„Ние не сме против вакцинирање, не е точно дека сме антиваксери, туку сметаме дека треба родителот сам да одлучува“, вели Елена Павлеска.
Подносителите на иницијативата не сакаа да кажат зошто законските измени ги бараат во време на епидемија на морбили и како би се спречило ширењето на заразните болести ако родителите изберат да не ги вакцинираат децата.
„Не сме тука да дискутираме за и против вакцините“, одоворија од иницијативата на која се потпишале 129 граѓани. Според нивното образложение, родителите се сомневаат во безбедноста и квалитетот на вакцините, потеклото, рокот и производителот, па оттука сметаат дека вакцината треба да е право на избор.
Галена Николовска-Ризвановиќ